Projekti i rrugës në Laknas, përplasje mes banorëve dhe kryeplakut

Rruga e re që po ndërtohet në Laknas, ka çuar në konfrontimin e banorëve me njëri-tjetrin gjatë ditës së sotme, pasi sipas banorëve, kjo rrugë kalon në një pjesë të tokave të tyre.
Banorët që preken nga projekti këmbëngulin se është devijuar plani fillestar, dhe se bashkia e Kamzës iu kishte premtuar që prona nuk do iu prekej.
Kjo ka sjellë dhe një përplasje me kryeplakun, i cili pretendon se projekti nuk është devijuar, dhe rruga i shërben një komuniteti të gjerë.
Në një intervistë të dhënë për Fax Neës, njëri nga banorët shprehet se plani fillestar i rrugës është devijuar dhe ka hyrë 1 metër brenda tokës së tij, dhe se ai nuk është lajmëruar apo ka marrë ndonjë shpërblim për këtë gjë.
“Nuk kanë ardhur as me na sjellë ndonjë letër, ndonjë diçka, para se me fillu punimet, kur kanë ardhur që kanë bërë projektin e të gjitha. Mua nuk më kanë sjellë absolutisht asgjë. Unë thjesht tani që po bëjnë rrugën, tani që po vënë këto kufizimet, tani po e kuptoj që më kanë hyrë në pjesë”, shprehet një nga banorët e zonës.
Një tjetër padrejtësi që është bërë pa lejen e tyre, sipas banorëve, është se ata kanë hapur një kanal të ujërave të zeza i cili gjithashtu nuk ishte i përfshirë në projekt.
Sipas disa prej banorëve, po shkaktohen konflikte mes tyre sepse njëra pjesë e banorëve proteston për pjesën e vet të tokës, që u është zënë, ndërsa pala tjetër ka frikë mos rruga pas këtyre kërkesave mund të kalojë nga toka e tyre.