Me lançimi e projektit të ri për kontrollin e faturave tatimore në kohë reale, qytetarët shqiptarë do të duhet të lëshojnë kupon tatimor për çdo pasuri personale të shitur mbi vlerën 500 mijë lekë.
Ky projekt pritet të aplikohet në muajin janar, dhe ka për qëllim shmangien e evazionit fiskal, Sipas qeverisë, sjell edhe disa risi të padëgjuara më parë në ndonjë vend tjetër të botës.
I ftuar në “Vizion plus”, ish-drejtori i tatimeve Artur Papajani, u shpreh se nëse do të vendosni të shisni një divan të përdorur, apo një pajisje elektronike, që e kalon vlerën prej 500 mijë lekësh, duhet të lëshoni faturë.
“Pra nëse ju doni të shisni dy mobilie, ju nuk mund ta kryeni këtë transaksion pa u pajisur me faturë. Që një individ të pajiset me faturë duhet të shkojë të marrë një numër regjistrimi, si dhe të kryeje disa veprime të tjera nga pas. Këto gjëra nuk i kemi dëgjuar në asnjë vend të Bashkimit Europian. Është një dëshmi e komplikimit të legjislacionit”, tha Papajani.
