KPK-ja ka marrë vendimin për shkarkimin nga detyra të drejtuesit të Prokurorisë së Vlorës, Ardian Ylli. Mësohet se problemet më të mëdha që u ndeshën gjatë hetimeve për Yllin ishin ato që lidheshin me pasurinë.
Trupa gjykuese që shqyrtoi çështjen u kryesua nga Roland Ilia, relator i çështjes ishte Olsi Komici dhe anëtare e treshes Valbona Sanxhaktari. Relatori Olsi Komici vuri në dukje se hetimet ndaj Yllit ishin bërë në të tre kriteret, teksa iu bë e qartë se në kriterin e figurës dhe atë të profesionalizmit nuk ishte gjetur asnjë problem.
Ylli vetë pretendoi përmes një analize financiare paralele nga ekspert kontabël, se KPK-ja duhej të merrte në konsideratë kursimet që atij ia kishte lënë babai, me vlerë 2.2 milion lekë.
Ai pranoi disa pasaktësi në deklarimet vjetore, por tha se pasuria e vetme ishte një apartament i fituar nga prindërit në vitin 1975 dhe i privatizuar në vitin 1994. Në fund Ylli tha se kishte treguar integritet dhe se kishte “të drejtën morale të kërkonte të rikonfirmohej”.
