E ardhmja e Interit sapo ka filluar. Antonio Conte ka firmosur kontratën që e lidh me klubin zikaltër për 3 vitet e ardhshme, me një pagë prej 9 milionë eurosh neto në sezon, pa përfshirë shpërblimet. Për këtë mbetet vetëm zyrtarizimi.
Megjithatë, ai që bën më shumë bujë është projekti i ri, i cili duhet të nisë pa vrer dhe tensione, pa “gra të para” apo telashe nëpër rrjetet sociale.
Thënë kështu, shënjestra është më se e qartë. Interi kërkon ta nisë këtë epokë të re pa Mauro Icardin, me argumentin se skuadra vlen më shumë sesa çdo individ. E në fakt kështu ka qenë, është dhe do të jetë gjithmonë.
“Vendimi i parë i rëndësishëm i Antonio Contes është marrë tashmë: Mauro Icardi nuk do të bëjë pjesë në projektin e tij tek Interi. Objektivi është të krijohet një grup i ri, i fortë dhe i bashkuar për ti bërë ballë çdo momenti delikat. Për këtë arsye ai dëshiron që Interi ta fillojë sezonin pa Icardin. Sipas tij, Mauro i ka sjellë shumë gjëra negative ambientit zikaltër këtë sezon!”, shkruam “Gazzetta dello Sport”.
Një problem ky, që Conte kërkon ta zgjidhë përpara grumbullimit të skuadrës, më 8 korrik.
