Koreja e Veriut thotë se ka pezulluar provat bërthamore dhe ato me raketa me rreze të gjatë veprimi. Ajo njoftoi gjithashtu se planifikon të mbyllë objektin e saj të provave bërthamore.
“Që nga 21 prilli Koreja e Veriut do të ndalojë testimet bërthamore dhe lëshimin e raketave balistike ndërkontinentale”, tha Agjencia Qendrore e lajmeve koreano-veriore, siç citohet nga agjencia Yonhap e Koresë së Jugut.
Pheniani tha se po e ndërmerrte këtë hap për ta përqendruar vemendjen tek përmirësimi i ekonomisë.
Vendimi erdhi pas një takimi të Partisë së Punëtorëve të Koresë së Veriut, që mban edhe pushtetin në këtë shtet.
Prej kohësh Koreja e veriut kryente teste nukleare, duke shqetësuar fqinjët koreano-jugorë dhe Japoninë, teksa Kim Jong-un ishte përfshirë edhe në retorika kërcënuese me presidentin amerikan, Donald Trump.
Tensionet janë ulur ndjeshëm kohët e fundit dhe palët po punojnë për të përcaktuar detajet e një takimi mes Trump dhe Kim Jong-un, që pritet të mbahet së shpejti.
