Pasi u përhap lajmi se ditën e sotme do të nisë prishja e banesave në zonën e Astirit, banorët e prekur nga shembja kanë dalë sërish në protestë për të mbrojtur objektet e tyre.
Një nga banorët e kësaj zone, është shprehur i irrituar se kjo histori, do të përfundojë me viktima.
“Te Unaza e Re nuk keni asnjë lloj shansi t’i prishni. Ne jemi për shtëpitë tona. O të na vrasin ata o do i vrasim ne, kështu do të përfundojë. Ne do të bëjmë kufoma në pragun e shtëpisë tonë. Duam drejtësinë tonë”, theksoi ai.
Teksa kanë 10 muaj që protestojnë, një nga banorët u shpreh se kjo është një lojë e Bashkisë së Tiranës dhe qeverisë, pasi këto banesa janë pa leje, dhe pronarët kanë rënë dakord që ato të prishen.
Sakaq, në këtë zonë ka një prani mjaft të madhe të punonjësve të Policisë Bashkiake dhe asaj të rendit, pasi priten që të prishen disa banesa pa leje, të cilat nuk kanë lidhje me projektin e Unazës së Madhe, por me rikualifikimin e një rruge që lidh zonën e Astirit me Kasharin.
