Philippe Coutinho do të jetë lëvizja më e madhe që është bërë në një merkato janari, ai u transferua nga Liverpool tek Barcelona për një shifër 160 milionë euro. Ditën e sotme është bërë edhe prezantimi i tij tek katalanasit, ku është prezantuar nga numri 1 i tyre, presidenti Bertomeu.
Presidenti Bartomeu ishte i pari që mori fjalën dhe prezantoi fantazistin brazilian, si yllin më të ri që i bashkohet katalanëve. “Të gjithë tifozët e Barcelonës janë të lumtur që e kanë Coutinhon këtu. Nuk ishte aspak e lehtë, por dëshira e tij, kombinuar me durimin e qetësinë, ishin çelësi i suksesit të këtij transferimi”, u shpreh numri 1 i katalanëve.
Më pas fjala i takoi brazilianit, që foli për herë të parë si futbollist i Barcelonës dhe shprehu gjithë emocionet e tij.
“Falënderoj presidentin dhe të gjithë ata që kanë bërë të mundur nënshkrimin. Unë jam shumë i lumtur, kjo është një ëndërr që bëhet e vërtetë. Unë shpresoj që t’iu përgjigjem në fushë të gjitha parashikimeve dhe pritshmërive. Është nder të jem këtu, në këtë klub kaq të madh, me histori të pabesueshme e me lojtarë të shkëlqyer. Është ëndërr e bërë realitet”, tha Coutinho.
Gjithsesi, për të parë Coutinhon në fushën e lojës do të duhet të presim rreth 20 ditë, kohë që i duhet brazilianit për të lënë pas dëmtimin.
