Kryetari i Partisë Demokratike, Lulzim Basha në një takim më qytetarët e Vorës pasditen e sotme, ka kërkuar që presidenti të zgjidhet nga populli.
Gjatë fjalës së mbajtur para simpatizantëve të PD-së, Basha u shpreh se largimi i kryeministrit Rama është parakusht i dialogut, ndërsa shtoi se kurrë nuk do të pranojë pushtet në tavolinë, duke refuzuar në këtë mënyrë ftesën e Ramës për dialog.
Ndër të tjera, propozoi një platformë dialoguese gjithëpërfshirëse të cilën e quajti referendum popullor.
“Kjo është beteja jonë dhe shqiptarët janë bashkuar. Do të derdhemi në 25 Maj me shpresën dhe besimin tek e nesërmja. Trafikantët dhe kriminelët nuk ndëshkohen por mbrohen.
Nuk ka asnjë institcion për të kontrolluar pushtetin e krimit të Edi Ramës. Le ta marrë përgjigjen edhe sot nga Vora që ne nuk do ta lejojmë këtë. Koha nuk pret. Në ditët e ardhshme do vendoset fati i Shqipërisë.
Në këtë betejë ne nuk ndahemi nga flamujt e partive. Kjo betejë bëhet për të gjithë, edhe për të çliruar socialistët e ndershëm dhe për vlerat e mëdha europiane, bëhet për t’i dhënë mundësinë çdo shiqptari që të ketë mundësitë të jetojë me dinjitet.
Kurrë nuk kemi qenë më të vendosur për ta çuar betejën tonë deri në fund. Këto tre muaj e kanë transformuar Shqipërinë. Sot jemi më afër se kurrë fitores së betejës sonë. Valbona Sako duhet të ishte e pandehur për vjedhjen e votave. Largmi i Edi Ramës është i panegociueshëm.
Duhet një dialog gjithëpërfshirës kombëtar që duhet të zgjidhet nga ju me një senat që garanton barazinë e pushteteve dhe një president të zgjedhur nga populli”, deklaroi Basha.
