Presidenti sirian, Bashar al-Assad dhe bashkëshortja e tij infektohen me Covid

Presidenti i Sirisë, Bashar al-Assad dhe gruaja e tij kanë rezultuar pozitivë në testet për koronavirus.

Në një deklaratë nga zyra e Assadit, është thënë se të dy janë testuar pasi kanë pasur simptoma të lehta të sëmundjes COVID-19.

Assad, 55-vjeçar dhe gruaja e tij Asma, 45-vjeçare do të kthehen në punë pasi të kalojnë dy apo tre javë të izolimit në shtëpinë e tyre, është thënë në deklaratë, duke shtuar që të dy janë mirë me shëndet dhe në gjendje stabile, shkruan Al Jazeera.

Deri më tani, në Siri janë regjistruar 16,000 persona të infektuar me koronavirus, në zonat që kontrollon qeveria, si dhe 1,063 viktima, mirëpo numrat besohet se janë shumë më të lartë.

Siria ka njoftuar javën e kaluar se do të nisë fushatën e vaksinimit, pa dhënë shumë detaje.