Avokati i njohur, Spartak Ngjela, është shprehur se ndërkombëtarët nuk do të lejojnë asnjë pakt mes qeverisë dhe presidentit.
Në një prononcim për gazetën ‘SOT’, Ngjela tha se presidenti Meta ka hyrë në listën e zezë të ndërkombëtarëve.
“Fakti që mazhoranca i ka shtuar edhe një akuzë tjetër presidentit nuk mendohet se mund të ketë pazar. Afati do të shtyhet domosdoshmërish sepse do të hetohet shkelja e re. Ajo kërkon një kohë që duhet të merret juridikisht komisioni hetimor. Pjesa e dytë për të pasur një pazar mes njërit dhe tjetrit, ekziston si mundësi. Tek dëmet e mëdha që janë bërë sidomos në Durrës, Meta është i implikuar me klientët e tij, por edhe Rama është i implikuar me klientët e vet për lejet e ndërtimit. Nëse këto mundësi vijnë dhe konvergojnë në një pikë atje fillon pazari. Nëse këto mundësi nuk konvergojnë në një pikë, atëherë do të vazhdojë akuza. Por ndërkombëtarët nuk mund t’ia falin Metës shkeljet e mëdha që ka bërë këtu. Jemi nën mbikëqyrjen e Perëndimit dhe politika amerikane është një mbështetëse e madhe për integrimin e vendit në Bashkimin Evropian. SHBA kërkon që vendi të plotësojë kushtet e vendosura nga BE”, tha ai.
Sipas Ngjelës, veprimet e Metës vijnë nga frika që ai ka nga SPAK-u dhe jo nga ndonjë humbje ekuilibri mendor. Ai shton se Meta nuk mund të jetë më në postin e presidentit, pasi ndërkombëtarët e kanë vulosur fatin e tij.
“Fakti që këto kushte nuk janë plotësuar ne kemi ngelur këtu ku jemi. Edhe në këtë rast ka ndodhur diçka, është një gjendje e rëndë e cila është pasojë korruptive. Pra nëse do të ketë pazare ose jo ka të bëjë me hetimin. Nëse hetimi ecën drejt asgjësimit të provave siç po ndodh tani gjithçka mund të ndodhë. Ndërkombëtarët e kanë vendosur ta shkarkojnë sepse ka bërë shkelje të rënda dhe ka sulmuar ambasadorët. Nuk është humbje ekuilibri nga ndonjë sëmundje, por është humbje e ekuilibrit nga frika, por ka cenuar shumë edhe autoritetin e shtetit shqiptar. Nuk është ambasadori kur godet, por politika amerikane, por Meta këto i ka vënë për konsum të brendshëm dhe mendon se mund t’i trembë ata. Të gjitha këto mblidhen dhe konvergojnë në një pikë dhe del që Meta ka bërë dy shkelje të rënda të cilat të çonin drejt destabilizimit të Shqipërisë. Ai nuk mund të rrijë më president dhe ky është vendim ndërkombëtar”, deklaroi ai.
