Kryeministri Rama është shprehur i vendosur për zhvillimin e dialogut mes Kosovës dhe Serbisë. Në deklaratën e përbashkët me kryeministrin Hoti, Rama ka injoruar deklaratat e Vuçiç, duke u shprehur se presidenti i Serbisë mund të flasë çfarë të dojë, por në fund do të pranojë sovranitetin e Kosovës.
“Presidenti i Serbisë mbron interesat e vendit të tij, dhe mund të thojë negocioj me perëndimin dhe jo me shqiptarët, por nuk ka shans të bisedojë me përëndimin për shqiptarët.
Fatkeqësia që ne na ka ndjekur si komb, është që kemi humbur raste historike, se nuk negociojmë dot me njëri-tjetrin. Nëse ne jemi një, presidenti i Serbisë mund të shkojë në hënë po të dojë, por në fund do të ulet me ne, me Kosovën që është e paprekshme dhe sovrane dhe me ne në Tiranë që do të mbështesim autoritetet e Prishtinës.
Përballë deklaratave të tilla provokuese ka dy rrugë: barrikadimi dhe përballimi. Barrikadimi është në dëmin tonë, përballimi sy më sy dhe drejtpërdrejt me mjetet e paqes është sfida jonë. Fiton kush është më i mençur, jo kush bën të fortin me facebook”, deklaroi Rama.
Hoti: Gati të shkoj në Washington për dialog me Serbinë pa Thaçin
Kryeministri i Kosovës, i pyetur nëse është gati që të shkojë në Washington i vetëm, për të negociuar me Serbinë, ai u shpreh i gatshëm. “Kosova ka institucione legjitime kushtetuese gati të marrin të gjitha përgjegjësitë. Unë jam i gatshëm dhe në koordinim me ambasadorin Grenell për të caktuar një datë, për të filluar procesin e dialogut me një axhendë fillimisht ekonomike dhe më pas politike të dialogut duke u nisur nga parimet tona.
Ne hyjmë për njohje reciproke dhe normalizim të marrëdhënieve mes dy vendeve. Dialogu nuk ka alternativë. Prandaj sa herë që ftohem në SHBA dhe Bruksel, do të shkoj të përfaqësoj shtetin e Kosovës. Për të protestuar është e drejtë e secilit, por ne kulturë politike dhe institucionale për të respektuar obligimet ndërkombëtare dhe këtë radhë do të sillemi njëlloj, se kur organet e rendit e ngrenë një çështje nuk pengojmë por përballemi me ato”, tha ai.
