Në një dalje për mediat, ish-kryeministri Berisha pohoi se nuk ka asnjë krisje të marrëdhënies me Metën, por u shpreh se ka vetëm një qejfmbetje. Reagimi i tij vjen në një kohë kur ai shprehu haptazi kritikat për procedurën e ndjekur nga Meta për lirimin nga detyra të Bajram Begajt si shef i Shtabit të Përgjithshëm të FA, duke i hapur rrugë zgjedhjes së tij si President. Berisha tha shkurt dhe qartë se nga Ilir Meta nuk i druhet aspak një tradhtie të mundshme, lidhur me mundësine e një bashkëpunimi me kryeministrin Rama. Sakaq, kryetarja e Lëvizjes Socialiste për Integrim, Monika Kryemadhi, duke u ndalur te përplasja mes ish-kryeministrit Sali Berisha dhe Presidentit Ilir Meta, ajo tha se nuk është juriste, që të diskutojë dekretet e Presidentit. Sipas Kryemadhit, Berisha mund t’i drejtohet Gjykatës Kushtetuese, për të qartësuar situatën. Marrë shkas nga ky qëndrim, Berisha citon se nuk do shkonte në Gjykatën Kushtetuese për procedurën e përzgjedhjes së Presidentit.
Prononcimi i plotë i Berishës
Në Tiranë ka mbërritur raportuesi i CDU-së gjermane për Shqipërinë, a keni zhvilluar një takim me të?Përfaqësues të PD-së janë takuar me të. Po ju vetë zoti Berisha?
“Përfaqësues të PD-së janë takuar me të. Sot jam këtu para jush për të denoncuar takimin e aleancës trilaterale të Ohrit, si një aleancë e rrezikshme për paqen, stabilitetin në Ballkan. Si një aleancë që synon vendosjen e hegjemonisë serbe dhe influencës ruse në rajon. Si një aleancë që i kundërvihet tërësisht procesit të integrimit evropian dhe procesit të tregut të përbashkët rajonal në kuadrin e nismës së Berlinit.
Pra, ky akt, ky “Samit i Ohrit”, është një Samit që prodhon serbomadhi, rusofili dhe asgjë të mirë për shqiptarët. Përshëndes qeveritë që refuzojnë anëtarësimin në këtë klub të Beogradit. Duket sikur do i shtohet dhe Mali i Zi dhe pavarësisht akuzave “Open Ballkan” vazhdon? Mali i Zi nuk është anëtarësuar, ka shkuar për të marrë pjesë sepse Mali i Zi ka një kompozim në të cilin një pjesë e popullsisë së tij është të themi serbe në fakt.
Pjesa dërrmuese e popullsisë malazeze nuk është me origjinë serbe, dhe në ruajte të këtyre ekuilibrave, por presidenti Gjykanovic ka kundërshtuar në mënyrë të prerë dhe të hapur anëtarësimin e vendit të tij në nismën e “Ballkanit të Hapur”.
Zoti Berisha, do shkoni në Gjykatë Kushtetuese për procedurën e përzgjedhjes së Presidentit? Meta ju ftoi ta çonit në gjykatë po ashtu dhe zonja Kryemadhi?
“Jo, unë jam shumë i kursyer në atë drejtim. E vërteta është që Kushtetuta në gërmë nuk njeh kufizim, por gërma është gërmë nuk ka kufizime, je jashtë apo brenda si Kushtetutë. Si frymë pastaj ka diskutim”.
Presidenti tha nuk ka krisje me ju, po ju keni një qejfmbetje me Metën?
“Jo, jo asnjë! Të vetmen qejfmbetje që kam, që do doja ta kishte shtyrë për raundin e pestë dhe shanset për një dështim të raundit të pestë nuk ishin të vogla”.
Mendoni se po i jep sinjale Ramës për një bashkëpunim Meta me këtë veprim?
“Jo, nuk mendoj. Normalisht. Gërma e Kushtetutës nuk parashikon mundësinë e firmosjes së dekretit kudo që ndodhet Presidenti, fryma është tjetër”.
Pasi z. Meta të lërë Presidencën përfundimisht, a do të bëni së bashku opozitë?
“Pa diskutim. S’ka diskutim ajo punë. Ajo është normale. Në qoftë se mund të kemi diferenca në gjëra të tilla, asgjë nuk na pengon ne në betejën tonë kundër Edi Ramës”.
Presidenti Meta, ditën e djeshme nuk e ka mohuar dhe as e ka pohuar mundësinë e një bashkëpunimi me kryeministrin Edi Rama. A i druheni sërish një tradhtie nga z. Meta?
“Jo, nuk i druhem. Nuk i druhem aspak asnjë tradhëtie”.
