Juventusi mund të përjashtohet nga Seria A, nëse nuk heq dorë nga Superliga. Kjo ka qënë ajo çfarë ka thënë Presidenti i Federatës Italiane të Futbollit, Gabriele Gravina.
Në fjalën e tij, numri një i futbollit në këtë vend, shprehet se do jetë i pashmangshëm një vendim i tillë, nëse bardhezinjtë nuk ndërrojnë mendje, shkruan Football Italia.
“Nëse në momentin e regjistrimit në kampionatin e ri të Serisë A, Juventusi do të jetë ende në Superligë, atëherë do të përjashtohet. Ka një rregull të qartë dhe preciz të Komitetit Olimpik Ndërkombëtar dhe më pas edhe në statutet e Komitetit Olimpik italian dhe të Federatave. Nëse një klub nuk e pranon këtë princip, më vjen keq, por atëherë do të jetë jashtë. Gjithsesi unë shpresoj që kjo luftë force të pushojë shpejt”, tha ai.
Juventus, Real Madrid dhe Barcelona janë të vetmet klube që nuk janë tërhequr zyrtarisht nga Super League, projekti i nisur më pak se një muaj më parë nga 12 klube elitare evropiane, por dështoi brenda 48 orësh.
Gjigandët e La Liga dhe Juventusi lëshuan një deklaratë të përbashkët të Shtunën duke kritikuar ‘presione të papranueshme, kërcënime dhe shkelje’ për të braktisur Super League.
