Presidenti i Brazilit, Jair Bolsonaro, ka dalë sërish pozitiv me koronavirus në testin e tretë që i është bërë.
Sipas The Guardian, lajmi është bërë i ditur nga Ministria e Komunikimit në Brazil.
“Testi i bërë nga presidenti dje, më 21, shfaqi rezultat pozitiv. Presidenti Bolsonaro është ende në gjendje të mirë, i shoqëruar nga ekipi mjekësor i presidencës”, thuhet në deklaratë.
Bolsonaro e ka nënvlerësuar shpesh pandeminë e koronavirusit, duke e cilësuar atë si një grip të thjeshtë dhe të zakonshëm.
Ai ka kundërshtuar edhe masat e kufizuese të marra nga shumica e vendeve, duke u shprehur se ato po e dëmtojnë ekonominë më shumë sesa vetë virusi.
