Gazetari Artan Hoxha ka shprehur qëndrimin e tij në lidhje me arrestimin e zv/presidentit të Federatës Shqiptare të Futbollit, Arben Dervishaj, për aferën e inceneratorit të Fierit. Hoxha tha se masa e sigurisë ndaj tij mund të ishte më e butë, dhe në këtë rast do të mjaftonte vetëm komunikimi i akuzës.
“Vëmendjen nga personat e arrestuar dhe ata në kërkim e ka tërhequr Arben Dervishi. Jam habitur që e arrestuan, sepse në të tilla raste do të mjaftonte komunikimi i akuzës. Nuk ka nevojë për masë kaq ekstreme. Nëse nuk do arrestohej Arben Derbishi, do të ishte në tribunën VIP me personazhet më të rëndësishme të vendit, është krahu i djathtë i presidentit të FSHF.
Është njeriu që është marrë me të gjitha objektet që janë ndërtuar, dhe në të gjitha këto është kompania e Arben Dervishit. Akuza për të cilën është arrestuar është fakti që ai dhe kompania e tij ka bërë supervizionin e inceneratorit të Fierit. Sipas SPAK ka pasur problem, është një gjë që do të provohet në gjykatë”, tha Hoxha.
Arben Dervishaj, zv. presidenti i FSHF, anëtar i Komitetit Ekzekutiv të Federatës Shqiptare të Futbollit (FSHF) prej vitesh, është prangosur si i dyshuar në skandalin e pagesave të dyshimta në çështjen e inceneratorit të Fierit në Shqipëri.
Arben Dervishaj që njihet si një nga njerëzit më të afërt të Armand Dukës, ka përfituar mbi 740 mijë dollarë ose 744 milionë lekë të vjetra për konsulencën e dhënë për inceneratorët. Sipas raportimeve të mëparshme, paratë rezultojnë të jenë marrë në 4 vite të ndryshme, përmes 21 faturave nga 2018-2021, në shuma te ndryshme që variojnë nga 80 milionë lekë të vjetra deri në 313 milionë lekë të vjetra në vit.
Emri i tij doli në skenë në dëshminë që dha në Komisionin Hetimor për Inceneratorët, administratorja e koncesionit të Tiranës, Arjola Kodra. Administratorja Kodra ka bërë të ditur se firma e “Integrated Energy BV SPV”, ka paguar konsulencën për kompaninë “Ave Consulting” sh.p.k. Kjo kompani, sipas Arjola Kodrës, është supervizore e koncesionit! “Kush është supervizor? Shoqëria ‘Ave Consulting’ sh.p.k. Autori është zoti Arben Dervishaj”, iu përgjigj Arjola Kodra pyetjeve të kryetares së këtij Komisioni, Jorida Tabaku. Arben Dervishaj është pjesë e Komitetit Ekzekutiv të FSHF-së prej dy mandatesh, dhe njihet si një njeri i besuar i Presidentit të FSHF-së, Armando Duka.
