Në konferencën e përjavshme me gazetarët, kreu i Partisë Demokratike, Sali Berisha, ka shprehur shqetësimin se situata në Shqipëri është eksplozive. Ky qëndrim marrë shkas nga çështja e inceneratorëve dhe projekti i Durrësit.
Berisha paralajmëroi të gjitha kompanitë që do të marrin pjesë në ndërtimin e portit turistik në Durrës, se do të futen në një listë të zezë. Berisha tha se PD-ja do t’u prijë të gjitha nismave që ky projekt të dështojë.
“Të gjitha këto e bëjnë situatën në Shqipëri eksplozive. Qytetarët shqiptarë, nuk mund të pranojnë të qëndrojnë duarkryq përpara këtyre akteve që tejkalojnë çdo imagjinatë të vjedhjes së pasurive të tyre publike.
PD do të përdorë të gjitha format për të kundërshtuar këtë plaçkitje të pronës publike më të çmuar që sot kanë shqiptarët. Porti mijëvjeçar i Durrësit është prona publike më e çmuar se çdo pronë tjetër publike në këtë vend.
Ne natyrisht do t’u prijmë të gjitha nismave për dështimin e këtij projekti. Jam sot këtu për të paralajmëruar se çdo kompani ndërtimi që do të marrë pjesë në këtë projekt do të “black” listohet. Do të futet në listën e zezë. I paralajmëroj mos të shndërrohen në shushunja për të vjedhur një pronë publike të qytetarëve shqiptare. Po regjistrohen nënkontraktorë tani në Durrës”, tha Berisha.
