Kryeministri Edi Rama gjatë fjalës së mbajtur sot në prezantimin e portalit të transparencë universitare, është shprehur se në universitet do të kryhen investime të vazhdueshme.
Rama shprehet se po punohet per infrastrukturën e konvikteve dhe siguron se brenda kësaj periudhe do të rindërtohen të gjitha godinat.
“Kjo i takon një proçesi ku ne do të kryejmë investimin me të madh se ç’është investuar në 30 vjet të marra së bashku, duke filluar nga ana e infrastrukturës, mjeteve didaktike, laboratorë.
Për infrastrukturën në konvikte është e sigurte që brenda kësaj peridhe do të rindërtojmë të gjitha konviktet, në një standard më të mirë”, deklaroi Rama.
Ndërkohë, Rama theksoi se po përgatitet një thirrje e dytë për punësimin e studentëve ekselentë në administratë, ndërsa tha se vendin e punës nuk e përcakton ministri, por rezultatet e studentëve.
Përsa i përket kartës së studentit, sipas kryeministrit përgatitjet kanë filluar, por faza e parë e implementimit do të nisë në Bashkinë e Tiranës.
Ndër të tjera, Rama pohoi se ky portal do të jetë një pasqyrë ku do të publikohen të dhënat buxhetore dhe financiare e universiteteve.
“Të gjitha informacionet e portalit kanë një vlerë tjetër, sepse nuk janë statistika të vdekura, por janë të dhëna që lidhen me jetën aktive të universitetit dhe të studentëve. Portali ka informacione të hollësishme mbi programet e shkëmbimit studentor së bashku me procedurat, mbi programet apo edhe bursat, kuotat e parashikuara. Universitet të krijojnë subjekte fitimprurëse”, tha Rama.
Tirana Today
