Presidenti i Serbisë ka shprehur në një intervistë për “Der Spiegel”, se ka rënë dakord me Ramën dhe me Zaev, që kur të flasë me presidentin Macron, të diskutojë dhe në emër të tyre. Lidhur me këtë deklaratë, një qëndrim ka mbajtur edhe ish-deputeti i PD-së, Tritan Shehu.
Në studion e “FaxNews”, Shehu u shpreh se Vuçiç është iniciatori i idesë së MiniShengenit, duke e konsideruar si një nga sukseset më të mëdha të rajonit në 30- vjeçarin e fundit. Shehu tha se Rama i ka dhuruar Vuçiçit kurorën e “Carit” të Jugosllavisë së Re.
“Vuçiç ka shtuar edhe që ai është iniciatori i idesë së MiniShengenit, duke e konsideruar si një nga sukseset më të mëdha të rajonit në 30 vjeçarin e fundit. Rama i dha kurorën e “Carit” të Jugosllavisë së Re Vuçiçit, ku do bëj pjesë Shqipëria, dhe Kosova do të jetë pjesë e Serbisë.
Kosova do jetë një shtojcë e Serbisë, një pjesë e zhdukur nga harta e vendeve të pavarura. Vuçiç ua bën të ditur të gjithëve, duke hequr dilemat e krijimit të këtij mashtrimi të madh që është “Shengeni” Ballkanik, që nuk është gjë tjetër, vetëm realizmi i ëndrrës së madhe e Serbisë së Re. Zbehja e plotë e Kosovës dhe roli i Vuçiçit.
Vuçiçit i është dhënë prej kohësh ky rol, nga një rrëshkitje absurd apo trashanike të politikës shqiptare, rajonale, e të jashme që nga viti 2014, duke i lëshuar hapësirë Serbisë të marrë rolin e faktorit kryesor të stabilitetit në rajon. Rol që e ka patur Shqipëria gjithmonë, duke zbehur rolin shqiptar. Roli i faktorit të Shqipërisë në rajon është i rëndësishëm. Ky rol kërkohet ti jepet Serbisë, një vend që nuk ka objektiv kryesor integrimin në Europë, në NATO si edhe marrëdhënien me SHBA, dhe kjo është fatkeqësi e madhe. Kjo është ajo që tha Vuçiç, që Rama i ka dorëzuar kurorën e Jugosllavisë së Re, me Shqipërinë pjesë dhe me një Kosovë brenda Serbisë”.
