Presidenti Meta ka komentuar deklaratat e kryeministrit Rama pas manifestimit të zhvilluar ditën e sotme.
Kreu i qeverisë deklaroi se Meta nuk firmos dot dekret për shpërndarjen e parlamentit dhe se Kuvendi nuk do ta njohë një dekret të tillë.
I ftuar në “Çim Peka Live” në Syri TV, Meta ritheksoi se qeveria ecën “projektin mafioz për të pushtuar Gjykatën Kushtetuese”. Kreu i shtetit shtoi se populli priste që Parlamenti të shpërndahej që sot.
“Tani unë jam i bindur që ju kërkoni të zgjidhni çdo gjë sot dhe kjo është normale. Mesazhi besoj ishte shumë i qartë, që populli shqiptar po humbet durimin nga grushti i shtetit, i cili, nëse nuk e dëgjon zërin e tij dhe ecën përpara me projektin mafioz për të pushtuar Gjykatën Kushtetuese, pra për të ekzekutuar Kushtetutën e Shqipërisë, padyshim që kjo është përmbysje e rendit kushtetues dhe unë do të filloj konsultimet me forcat politike sepse është e qartë se populli e priste shpërndarjen që sot. Unë e bëra të qartë që deri më 15 mars do të administroj me shumë përgjegjshmëri këtë situatë. Nga sot ka nisur një pranverë kuqezi, në kuptimin e rritjes së ndërgjegjësimit për mbrojtjen e kushtetutës. Jemi këtu sepse kemi luajtur me kushtetutën tonë dhe kemi lejuar edhe të tjerët të tallen me kushtetutën tonë”, tha ai.
