Sekretari amerikan i Shtetit, Mike Pompeo, u shpreh se presidenti Donald Trump është i përgatitur të përdorë edhe forcë ushtarake kundër Turqisë nëse lind nevoja.
Në një intervistë për CNBC, Pompeo tha se ata preferojnë paqen para luftës por nëse do të nevojiten veprime ushtarake, presidenti Trump është i gatshëm ta ndërmarrë atë hap.
Kujtojmë se presidenti Trump është kritikuar shumë pas vendimit për të tërhequr forcat amerikane nga Siria, duke braktisur kështu kurdët. Pompeo nuk dha detaje sa i përket vijës së kuqe që do të shkaktonte ndërhyrjen e forcave ushtarake të Amerikës.
“Ju përmendët fuqitë ekonomike që kemi përdorur. Sigurisht që do t’i përdorim. Do të përdorim edhe fuqitë diplomatike. Ato janë të parapëlqyerat”, tha Pompeo.
Trump tha të hënën në një konferencë për shtyp se SHBA-të nuk kishin rënë dakord me kurdët që t’i mbronin përjetësisht, dhe që SHBA-të nuk do të mbanin anë.
