Sekretari amerikan i Shtetit, Antony Blinken, ka përcjellë një mesazh për ndarjen nga jeta të ish-Presidentit të Republikës, Bujar Nishani. Në një postim në llogarinë e tij në Twitter, Blinken thotë se SHBA-ja ndan dhimbjen me popullin shqiptar, për ndarjen nga jeta të ish-Presidentit. Ai nënvizon ndër të tjera se Nishani ka luajtur një rol të rëndësishëm në forcimin e marrëdhënieve SHBA-Shqipëri.
“Ne ndajmë dhimbjen e popullit shqiptar për largimin nga jeta të ish-Presidentit Bujar Nishani. Kontributet e tij në marrëdhëniet SHBA-Shqipëri dhe partneritetin tonë të qëndrueshëm, lënë pas një trashëgimi jetëgjatë”, shprehet Sekretari amerikan i Shtetit, Antony Blinken në mesazhin e shpërndarë nga ambasada e SHBA-së.
Ish-Presidenti Bujar Nishani, ndërroi jetë dy ditë më parë, pasi prej javësh ishte i shtruar në një spital në Gjermani dhe kaloi në vdekje klinike pa mundësi rikthimi. Situata shëndetësore e ish-Kreut të Shtetit u rëndua pas infektimit të tij me COVID-19 dy muaj më parë. Ai vuante nga një sëmundje autoimune në mëlçi, dhe nuk arriti t’i tejkalojë pasojat që virusi famëkeq i kishte lënë në organizëm.
