Pas një muaji pushim, pritet që politika ti rikthehet punës. Fokusi është tek kryedemokrati Lulzim Basha, i cili do të vendosë për fatin e ish-kryeministrit Sali Berisha. Ky i fundit është shpallur “non grata” nga Departamenti Amerikan i Shtetit, dhe amerikanët nuk e duan në Parlament. Por gjithçka është në dorë të Bashës, i cili para datës 9 shtator që është planifikuar të mblidhet Kuvendi i ri i dalë nga zgjedhjet parlamentare të 25 prillit, do të thërrasë Kryesinë e PD, ku do të vendoset nëse partia që ai drejton do të distancohet ose jo nga Berisha.
Në muajin korrik, Berisha tha shkurt dhe qartë se nuk do të tërhiqet nga vendimi për tu bërë pjesë e Parlamentit të ri në muajin shtator. Kjo deklaratë e tij erdhi pas mesazhit që ka dhënë ambasadorja e SHBA-së ndaj Lulzim Bashës, duke ia bërë të qartë që SHBA-ja, e cila ka shpallur Sali Berishën “non-grata”, nuk e do këtë të fundit si deputet në Parlament.
Në një kohë që SHBA-ja është e prerë në kërkesën e saj, që ai të mos jetë më përfaqësues i popullit në Kuvend, pasi e cilëson si minues të demokracisë, Berisha nuk ka të ndalur me përpjekjet e tij për të bindur shqiptarët dhe ndërkombëtarët se e ka vendin në Parlament.
“Jam Sali Berisha o budallenj, nuk tërhiqem unë o budallenj, jam Sali Berisha, o çakej, që flisni si çakej, e dini si më dukeni mua, plehra më dukeni. Se të tillë jeni, para interesit kombëtar nuk njoh askënd tjetër, s’njoh asgjë unë”, ishte një ndër mesazhet e Berishës, të cilën e përcolli me anë të një videoje në rrjetet sociale.
PD-ja në sezonin e ri politik ka dy pika të rëndësishme si kërkesë nga partnerët më të rëndësishëm të Shqipërisë, SHBA-të. Ka të bëjë me marrjen e një vendimi për Sali Berishën, pra që ta largojë nga grupi parlamentar dhe të nisë një stinë të re politike për të bashkëpunuar me mazhorancën.
Berisha “non grata”
Në 19 maj 2021, Sekretari Amerikan i Shtetit, Antony Blinken, njoftoi se kishte firmosur fundin e Sali Berishës, duke e futur në listën e zezë bashkë me familjen, për korrupsion të rëndësishëm, përdorimin e pushtetit për t’u pasuruar, mbrojtjen e vetes, familjes dhe aleatëve në afera nga veprimi i drejtësisë, si dhe për minim të demokracisë në Shqipëri.
Në 30 korrik, diplomatja Yuri Kim pas një takimi me kreun e PD-së, Lulzim Basha në selinë blu, ia bëri të qartë se SHBA-të nuk e duan në shtator Sali Berishën në Kuvend.
Ajo i kërkoi Lulzim Bashës që të distancohet nga Sali Berisha. “Një parti nuk mund të ‘hajë bar’ për hir të një deputeti”, tha Kim, referuar shprehjes së thënë në komunizëm “edhe bar do hamë dhe nuk do i përkulemi armikut”. Në një kohë kur SHBA-të i kërkojnë të distancohet, Basha ka zgjedhur që të heshtë!
TIRANA TODAY
