Në përfundim të ndeshjes mes Kamzës dhe Laçit ka pasur një episod të shëmtuar që nuk i shkon për shtat futbollit. Gjyqtari kryesorë Eldorian Hamiti është dhunuar nga disa tifozë që kaluan gardhin rrethues, u futën në fushë, duke ushtruar dhunë ndaj gjyqtarit. Dhuna ndaj gjyqtarit Hamiti pritet të këtë pasoja të rënda për klubin e Kamzës teksa dështoi të sigurojë mbrojtjen e zyrtarëve të ndeshjes.
Tifozët nuk e pritën aspak mirë vendimin e kryesorit teksa akordoi penallti në favor të Laçit në minutën e 95-të. E gjithë kjo skenë më pas të linte një shije të hidhur, duke na rikthyer shumë pas në kohë, një incident i cili ka detyruar Federatën Shqiptare të Futbollit të mblidhet në mënyrë urgjente.
As prezenca e forcave të rendit nuk i qetësoi tifozët ndërsa gjyqtarët u ngujuan në dhomat e zhveshjes për disa minuta, në mënyrë që të garantohej largimi i tyre nga stadiumi. Policia e shtetit konfirmoi se 10 tifozë janë shoqëruar për këtë incident.
Pas dhunës në ndeshjen mes Kamzës dhe Laçit Federata Shqiptare e Futbollit po zhvillon një mbledhje urgjente, ndërsa pas pak minutash pritet që të dalë me një komunikatë zyrtare. Për mbarëvajtjen e ndeshjes përgjigjet ekipi që organizon ndeshjen me polici private, por në momentin që situata u agravua ndërhyri policia e shtetit duke marrë në mbrojtje gjyqtarët nga fusha për në dhomat e zhveshjes. Kamza ndodhet në vendin e fundit me 17 pikë në renditje, ndërsa pritet që ta pësojë rëndë nga incidenti që u regjistrua ditën e sotme.
