Qeveria ka forcuar masat, për të parandaluar përhapjen e koronavirusit vdekjeprurës. Situata është alarmante, e ndërsa në prononcimin e fundit Rama njoftoi se të gjithë ata që thyejnë vetë-karantinimin do të gjobiten me një vlerë prej 5 mijë eurosh.
Duke nisur nga sot do të vendosen postblloqe të Policisë së Shtetit dhe ushtrisë në të gjitha rrugët e Tiranës, për të kontrolluar makinat nëse ka persona të ardhur 14 ditët e fundit nga Italia apo Greqia.
“Sot do të dalë në rrugë struktura të Policisë së Shtetit dhe policia ushtarake që do të organizojnë postblloqe për kontrolle të automjeteve dhe do të ndalojnë dhe do të verifikojnë nëse kanë brenda automjetit persona që kanë ardhur nga Italia apo Greqia në 14 ditët e fundit, të cilët ndalohen të dalin nga shtëpia. Kush kapet në rrugë, do të dënohet me gjobë prej 5 mijë euro dhe do të ndalohet të kthehen në Italia apo Greqi nëse s’do të paguajë gjobën. Ju kërkoj shumë ndjesë, nuk do doja të isha në këtë pozicion, por këto masa shtrënguese na duhen sepse jemi në kohë lufte dhe jo në kohë normale”, tha Rama.
Pak më parë, u shënua viktima e parë nga koronavirusi në vendin tonë. 73-vjeçarja nga Durrësi ndërroi jetë për shkak të komplikacioneve të shkaktuara nga ky virus.
Vetëm katër ditë më parë, ajo është ndjerë më keq, duke u paraqitur sërish në spital. Gruaja dhe familjarët i kanë thënë mjekëve se kishte probleme me frymëmarrjen, dhe ata e kanë shtruar me dy pacientë të tjerë në dhomë.
Gjatë kësaj periudhe, në dhomë kanë hyrë dhe dalë familjarë të saj dhe të dy pacientëve të tjerë, duke rritur kështu ndjeshëm rrezikun se mund të jenë infektuar edhe të tjerë.
