Turma pritet që të tentojë sërish të mësyjë në Kryeministri, por policia e Garda kanë marrë masa për protestën e sotme. Kryeministria, Ministria e Brendshme dhe Parlamenti janë rrethuar në mbrëmje me kangjella e rrjetë hekuri.
Sikundër është njoftuar edhe më herët, policia ka hartuar një plan operacional mbi menaxhimin e protestës, ndërsa në gatishmëri do jenë blindat e ujit, forcat “Shqiponja” dhe ato RENEA. Mbetet të shihet se çfarë do ndodhë, ndërsa nuk përjashtohen edhe incidentet.
Një ditë më parë, kryedemokrati Basha ka vijuar me kërcënimet, se opozita do rrëzojë qeverinë. Ai dje zhvilloi takime në Kamëz e Kavajë, dy bastionet e PD, ku u kërkoi qytetarëve që të protestojnë para Kryeministrisë.
Në Kavajë, ai deklaroi se kjo është një betejë për jetë ose vdekje. Basha u shpreh se shqiptarët kanë përpara vetes betejën më të madhe për t’i dhënë fund tranzicionit të tejzgjatur në vend.
Për të, kjo është përballje vendimtare dhe pa kthim. Ndërsa nga Kamza u shpreh se sot do të ndodhë goditja finale ndaj tiranisë së krimit. Basha deklaroi se sot tirania do të shkundet.
