I ati i Stresit, dy ditë më parë paditi Ballën, e ndërsa dje reperi përfundoi në qeli. Sali Lushaj dhe Avdyl Gjokmakaj, paditën në gjykatë për shpifje kryetarin e grupit të PS, Taulant Balla, pas akuzave në kuadër të dosjes Babale, videos së dytë të Fredi Alizotit. Lushaj shprehej se padinë e mbështet te një deklaratë e Ballës në “Opinion”, në datë 11 tetor, që sipas tij ka thënë se janë pjesë e “bandës së Berishës”.
Në një prononcim për mediat, ai deklaroi: “Ne nuk jemi banda e Berishës. Unë me Gjokmakajn jemi pishtarë të demokracisë. Kam derdhur gjak për këtë demokraci. Vëllain e kam dëshmor të demokracisë. Bashkë me Avdyl Gjokmakaj, të dy jemi përmendur me datë 11 në “Opinion”. Z. Balla të vijë në gjykatë”.
I ati i Stresit kërkoi nga Balla 2 milionë lekë. Rasti në fjalë ka ndodhur në datën 16 tetor, e ndërsa dje, 17 tetor, i biri përfundoi në pranga.
“Forca e Ligjit në veprim vë në pranga një nga antarët e një grupi kriminal që operon në Tiranë, në lidhje me aktivitetin e kundraligjshëm me tendencë “Trafikim narkotikësh” dhe “Krimeve kundër personit”.
Njësia Hetimore e Task-Forcës Speciale Vendore Tiranë, në Departamentin e Policisë Kriminale pranë Drejtorisë së Përgjithshme të Policisë së Shtetit, në bashkëpunim me Forcën e Posaçme Operacionale të Policisë së Shtetit, bëri kapjen dhe ndalimin e shtetasit Arkimed Lushaj, 31 vjeç, lindur në Tropojë dhe banues në Tiranë.
Gjykata pranë Shkallës së Parë Tiranë, me vendimin nr 1972, datë 17.10.2018, ka caktuar masën e sigurisë “arrest me burg”, në lidhje me veprën penale “Prodhim dhe mbajtje pa leje të armëve luftarake”, parashikuar nga neni 278/1 i Kodit Penal.
Ndalimi i këtij shtetasit u bë pas një hetimi disa mujor, në bashkpunim me Prokurorinë pranë Gjykatës së Shkallës së Parë Tiranë. Me metoda speciale të hetimit që janë kryer në funksion të një grupi kriminal që operon në Tiranë, në lidhje me aktivitetin e kundraligjshëm me tendencë “Trafikim narkotikësh” dhe “Krimeve kundër personit”.
Gjatë arrestimit, këtij shtetasi, në ambjentet e një hoteli të ndodhur në vendin e quajtur Linzë, gjatë kontrollit të ushtruar, i janë gjetur dhe sekuestruar në cilësinë e provës materiale një sasi e vogël lënde narkotike e dyshuar kokainë. Një armë zjarri pistoletë e tipit “Pjetro Beretta”, si dhe 12 fishekë të modelit 7.65 mm.
Nga veprimet hetimore të kryera në lidhje me ngjarjen e mësipërme, filloi procedimi penal në gjendje të lirë në lidhje me veprën penale të “Moskallëzimit të krimit”, parashikuar nga neni 300 i Kodit Penal, ndaj shtetases P. Ç., 20 vjeçe, banuese në Tiranë”.
https://tiranatoday.com/ne-hotel-me-stresin-kush-eshte-20-vjecarja-qe-u-fut-ne-telashe-fansat-kur-jane-oraret-e-vizitave/
