Në kohën kur SHBA janë duke evakuuar persona që janë në rrezik nga talebanët, ish-Sekretarja Amerikane e Shtetit, Madaleine Albright, ka shprehur mirënjohjen e saj ndaj vendeve që do të ofrojnë strehim për afganët.
Albright ka shprehur qëndrimin e saj, me anë të një postimi në Twitter, lidhur me strehimin dhe mbrojtjen e afganëve nga talebanët. Albright tha se i duhet dhënë fokus kryesor shpëtimit të jetëve të rrezikuara në Afganistan.
“Ne duhet të përqendrohemi në shpëtimin e jetëve në Afganistan. Ndërsa SHBA po punon për të evakuuar ata që janë në rrezik të veçantë nga talebanët, unë jam mirënjohës ndaj Shqipërisë, Kanadasë, Kosovës dhe Maqedonisë së Veriut për ofrimin e strehimit aleatëve afganë, grave dhe udhëheqësve të shoqërisë civile. Shpresoj dhe pres që të tjerët të ndjekin”, shprehet ajo.
Për këtë çështje reagoi edhe Komiteti i Senatit Amerikan për Marrëdhëniet me Jashtë. Edhe ata kanë shprehur mirënjohjen e tyre, në lidhje me pranimin e Shqipërisë për të strehuar afganët e rrezikuar nga talebanët. Sipas Komitetit, populli shqiptar i tregoi edhe një herë botës se çfarë do të thotë fjala besë.
“Unë mirëpres vendimin e qeverisë shqiptare për t’u dhënë një strehë të përkohshme të sigurt atyre që ikin nga sulmet e talebanëve në Afganistan. Populli i Shqipërisë po i tregon edhe një herë botës se çfarë do të thotë “BESA”. Ju keni respektin dhe falënderimet tona”, shkruan Komiteti i Senatit Amerikan për Marrëdhëniet me Jashtë.
Kujtojmë se DASH ka shpallur një program të ri, i cili u mundëson mijëra afganëve mundësinë të zhvendosen si refugjatë në SHBA. Sakaq, edhe ambasadorja e SHBA, Yuri Kim ka komentuar vendimin e qeverisë, për të strehuar refugjatët afganë të kërcënuar nga talebanët në vendin e tyre. Ajo ka shpërndarë deklaratën e Komitetit për Marrëdhënie me Jashtë të Senatit Amerikan ku përmendet dhe besa e shqiptarëve.
“BESA – kur ka më shumë rëndësi, populli shqiptar tregon gjithmonë nder, guxim dhe mirësi. Ne jemi krenarë t’ju quajmë mikun dhe aleatin tonë”, shkruan ajo në një postim në Twitter. /Tirana Today
