Ambasadori gjerman në Tiranë, Peter Zingraf ka përsëritur edhe njëherë se Gjermania voton pro hapjes së negociatave për Shqipërinë me Bashkimin Evropian, me disa kushte.
Ai tha për “Klan Plus” se është detyra e partive politike që të gjejnë një zgjidhje për krizën. Ndërsa sa i përket ndikimit që mund të ketë zgjatja e krizës në çeljen e negociatave, Zingraf u shpreh se nuk mund të spekulojë.
“Drita jeshile për Shqipërinë varet tashmë nga shtetet e tjera anëtare të BE, ne kemi vendosur një po me kushte, ndërkohë që presim tashmë se çfarë do të vendosin shtetet e tjera. Çdo propozim që sjellin individualisht shtete, duhet të përkthehen në gjuhën përfundimtare me vendimin e këshillit. Ju them për Berlini ku kemi shumicë deputetesh për një po në parim, por me disa kushte”- tha ai.
Pyetur nëse Gjermania ka bërë përpjekje për të ulur palët në tryezë për një zgjidhje kompromisi për krizën, ai ka deklaruar: Gjetja e një kompromisi është për institucionet shqiptare nuk është detyra jonë. Kam parë se hapi i parë u realizua dje për tu ulur së bashku pozitë – opozitë. Vlerësoj faktin se edhe opozita jashtë parlamentit dërgoi për herë të parë përfaqësuesit e saj në tryezën e reformës zgjedhore. Mendoj se institucionet dhe partitë politike shqiptare do ta gjejnë një zgjidhje”, deklaroi ai.
