Policia e Gjirokastrës ka bërë të mundur ndalimin e një trafikanti klandestinësh, të cilit i janë gjendur në makinë 6 shtetas sirianë të parregullt.
Trafikanti është ndaluar në afërsi të kthesës së fshatit Mashkullorë ku brenda në makinë ai fshihte 4 meshkuj dhe 2 femra, njëra prej të cilave shtatzënë.
Emigrantët klandestinë dyshohet ta kenë kaluar kufirin e gjelbër në Kakavijë, teksa kjo shënon rastin e dytë brenda dy muajve, të kapjes së një trafikanti.
I pari ishte një shtetas irakian që trafikonte klandestinë nga Greqia në Shqipëri, nga kufiri i gjelbër. Gjatë muajit korrik policia e kufirit Gjirokastër në bashkëpunim me Frontex ka ndaluar rreth 70 shtetas të huaj nga vendet MENA ( Middle East and North Africa).
