Prej ditës së djeshme u përgjysmua numri i urbanëve në Tiranë. Transporti urban në Tiranë reduktoi shërbimin për shkak të mos përballimit të kostove të larta nga kriza e pandemisë, dhe shtrenjtimin e çmimit të naftës. Përfaqësuesit e Unionit të Transportit Publik bëjnë me dije se pas një viti e gjysmë nga rihapja e transportit publik, ndodhen ende në pikën fillestare, ku sipas tyre, asnjë nga institucionet përgjegjëse nuk ka marrë asnjë masë apo plotësim të kërkesave ekonomike të premtuara.
E ndërsa sot, në një deklaratë për mediat, përfaqësuesi i Shoqatës së Transportit tha se po falimentojnë. Ndër të tjera u paralajmërua se nëse nuk do plotësohen disa nga kërkesat e tyre, do të reduktohet akoma më shumë numri i urbanëve.
“25 milion lekë në ditë kosto. Kjo ka rënduar mbarëvajtjen. Duke u rritur çmimet, na ka shkaktuar një ankth dhe frikë. Duke qenë një sektor kaq i madh që është urë lidhëse. Kemi ndjerë një neglizhencë të madhe, duke na shpërfillur dhe duke mos u ulur në tavolina të përbashkëta. Në fakt siç e keni parë, ka pasur një rritje edhe shporta bazë ka pasur rritje.
Ne kemi kërkuar indeksimin e çmimit, që të shohim se ku janë të ardhurat e shërbimit të transportit. Kemi të ardhura vetëm nga bileta. Duhet të ulemi e të shohim një gjuhë të përbashkët për plotësimin e kërkesave, që të mos shkojmë te rritja e çmimit.
Rritja e çmimit të naftës ka ndikuar drejtpërdrejt, dhe shumë prej subjekteve po falimentojnë. Ashtu siç e kemi bërë me dije me kolegët, ne kemi paralajmëruar këtë. Do shkojmë edhe më tej në reduktim të urbanëve”, tha ai.
