Kreu i Grupit Parlamentar të PS, Taulant Balla, u është përgjigjur akuzave se mazhoranca dhe Presidenti kanë nisur një stinë të re në marrëdhënien e tyre. Balla konfirmoi se nuk ka asnjë marrëdhënie të re dhe as të vjetër me Kreun e Shtetit, Ilir Meta.
Ai tha se komunikimi me institucionin e Presidencës ka qenë i domosdoshëm për dekretimin e ndryshimeve në Kodin Penal, ndërsa shtoi se marrëdhënia mes Presidentit dhe qeverisë nuk ka ndryshuar.
“Po u shuaj gjithë kureshtjen, për të gjithë ato skena xhelozie. Nuk ka asnjë marrëdhenie të re dhe as të vjetër me Ilir Metën.
Ai është Presidenti i Republikës, ne jemi shumica qeverisëse. Patjetër që në dobi të hyrjes në fuqi të Kodit Penal, kemi komunikuar me institucionin e Presidencës, për të mos humbur kohë. Në mënyrë që të hynin në fuqi ndryshimet me Kodin Penal.
Për shkak të këtij komunikimi, Kodi i ri Penal për situatën e pandemisë, hyn menjëherë në fuqi. Kështu që ata që thyejnë sigurinë e përbashkët kundrejt Covid, ndëshkohen me burg nëse janë përsëritës e nëse veprimet i bëjnë në mënyrë të qëllimshme”, u shpreh ndër të tjera Balla.
