Në konferencën anti-korrupsion, kreu i Kadastrës, Artan Lame u shpreh se punonjësit e institucionit që ai drejton kanë kërkuar rritje rrogash. Për të, kjo është shenjë që në Kadastër ka rënë korrupsioni, pasi kohë më parë punonjësit e Hipotekës nuk e kërkonin rrogën për shkak të rryshfetit të lartë. Ai tha se fakti që punonjësit po bëjnë presion për rritje rroge, dëshmon se është ulur shumë indeksi i korrupsionit.
“Vetë ritmi i punës nëpërmjet sistemit, nuk të lë kohë për ta thirrur, për ti thënë hajde te kafja, për ti thënë të shkojmë atje, të takohemi, mesazhi e gjithë të tjerat.
Veç rritmi i punës nëpërmjet sistemit e përmirëson gjënë. Ajo që i vë kapakun dhe që e kam vënë re këto ditë te fundit, dhe që ma kujtoi Blendi Gonxhe me thënë të drejtën me të cilin ka 22 vite që nuk na ndan fati, herë bashkohemi, herë ndahemi, por jemi gjithmonë në krah të njëri-tjetrit, është fakti që në Kadastër kanë kërkuar rritje rroge.
Shenja më e sigurtë e uljes së korrupsionit. Në qoftë se për doganierët dhe punonjësit e Hipotekës dikur thuhej “po pse ka edhe rrogë”, fakti që tani po bëjnë presion për rritje rroge tregon që është ulur shumë indeksi i korrupsionit”, u shpreh Lame.
