Rama ka folur sot për çështjen e negociatave. Kryeministri u shpreh se BE me vendimin, apo mos-vendimin, për Tiranën dhe Shkupin, i dha një goditje besueshmërisë tek familja evropiane. Ai tha më tej se pas këtij vendimi, edhe më e vështirë është bërë për palët që të besojnë për një ‘dritë në fund të tunelit’. I revoltuar me këtë vendim, Rama u shpreh haptazi se BE nuk po e mban fjalën!
Në konferencën ‘Shtetet e Bashkuara të Amerikës në Ballkanin Perëndimor’, Rama tha se me vendimin e 18 tetorit, pozicioni i BE-së është dobësuar tej mase, dhe ndikimi i saj në procesin e dialogut Kosovë-Serbi.
“Shqipëria ka një marrëdhënie speciale me SHBA-në. Nëse sot Ballkani është një vend më i mirë, kjo i dedikohet në radhë të parë SHBA-së. Ballkani është pasqyra e suksesit më rrezatues i politikës së jashtme të SHBA pas Luftës së Ftohtë.
Nisi me një konflikt të madh, pastaj u shkua në bomba dhe tani po flasim për intensifikim të bashkëpunimit rajonal. Jemi larg paqes përsa kohë nuk ka një zgjidhje të konfliktit mes Serbisë dhe Kosovës.
Pas vendimit të KiE-së në 18 tetor, pozicioni i BE është dobësuar tej mase dhe ndikimi në procesin e dialogut është tkurrur, pasi BE-ja me vendimin e marrë apo mos vendimin që rezultoi në fund të një debati të nxehtë mes veti ndër të tjera, dhe në radhë të parë, i dha një goditje besueshmërisë së vetë. Dhe do të jetë e vështirë për të dyja palët që të besojnë në mundësinë e icentivave që mund të mos mbahen.
Nuk është hera e parë, pasi po bëhen disa që BE-ja nuk mban fjalën. Dhe në rastin e Kosovës besoj që është një nga shembujt më flagrant të mungesës së kapacitetit për të mbajtur fjalën.
Nuk është një shtet, por një tërësi shtetesh, e cila funksionon në bazë të konsensusit dhe një të kundërvihet, e gjitha vihet në pozitë të vështirë.
E kam fjalën për kushtëzimin absurd, të liberalizimit të vizave për Kosovën pas marrëveshjes për kufirin me Malin e Zi. Është një rast unikal.
Nga 2014, BE-ja liberalizoi vizat për 100 mln njerëz, që nuk janë në proces negociatash. Marrja peng e 2 mln shqiptarëve, reflekton mungesën e kohezionit dhe kapacitetit dhe rënien e gjithë familjes Europiane në vazhdimësi në grackën e një vendi apo tjetri që imponon mos konsensusin.
Por shqiptarët nuk kanë asnjë rrugë tjetër, vetëm të ecin në rrugën që ka piketuar historia jonë. Që është e trashëguar si amanet në gjithë vetëdijen e kombit tonë”, tha Rama.
