Kryetari i Këshillit Bashkiak të Durrësit dhe njëherësh drejtori i Hekurudhave, Ani Dyrmishi ka reaguar pas denoncimit të Partisë Demokratike se automjetit me të cilin udhëtonte është qëlluar me armë zjarri.
Në një lidhje telefonike me “News24”, Dyrmishi mohon të ketë konflikte me persona të caktuar, ndërsa theksoi se makina drejt të cilës është qëlluar përdoret edhe nga njerëz të tij të afërt.
Mes të tjerash, shton se në momentin e atentatit nuk ndodhej në makinë, por në shtëpi.
“Është një ngjarje që nuk ka të bëjë fare me mua, me personin tim. Nuk kam pas asnjë lloj atentati në drejtimin tim apo të makinës sime, pasi unë nuk disponoj makinë në pronësinë time, por përdor një makinë tjetër, dhe që është realisht makina që është goditur. Është një makinë që ka të bëjë me një person, që ka qenë shoferi i babait tim në të kaluarën, dhe përdoret nga unë, djali i hallës sime dhe shumë persona të tjerë. Në fakt, muajt e fundit nuk e kam përdorur. Nuk kam qenë në makinë, kur është qëlluar, dhe as nuk është goditur në drejtimin tim”, deklaroi kreu i Këshillit Bashkiak të Durrësit.
Sipas tij, ekziston mundësia që në drejtim të automjetit të jetë qëlluar në mënyrë aksidentale.
“Makina është në rrugë, nuk është makinë private. Unë kam qenë në gjumë, kur jam njoftuar për ngjarjen. Më telefonuan organet kompetente në Durrës, por makina nuk ka lidhje me personin tim. Unë lëviz i lirë dhe i qetë në gjithë Durrësin, sepse më njohin shumë mirë të gjithë qytetarët”, nënvizoi Dymirshi.
