Sekretari Juridik i Partisë Demokratike, Çlirim Gjata u shpreh se vendi duhet të shkojë në zgjedhje të parakohshme.
I ftuar në “ABC news”, Gjataj theksoi se opozita joparlamentare nuk ka ndërmend të ulet në një tryezë dialogu me kryeministrin Edi Rama. Ndërsa shtoi se të gjitha veprimet e kryera nga opozita, që nga djegia e mandateve, bëri që Bundestagu të vendoste plotësimin e 9 kushteve.
“Ajo e Bundestagut është protestë permanente, e cila thotë: plotësoji ato kushte o Edi Rama ose pi detin. Si do ti plotësojë ato kushte? A ka protestë më të madhe se 9 kushtet e Bundestagut? Prandaj duhet shkuar në zgjedhje të parakohshme.
Nuk ka rëndësi se kur mbahen ato zgjedhje, kjo do shihet hap pas hapi. Tashmë Edi Rama është me shpatulla pas murit. E vetmja gjë që po bën qeveria është propaganda. Ne kemi kërkuar dhe do të vazhdojmë të kërkojmë qeveri tranzitore.
Me Edi Ramën nuk zgjidhet asgjë. Atë që thotë Rama për opozitën parlamentare, a e di si më duken këta të opozitës parlamentare?
Si emigrantët e shkretë që martohen për letra. Mbaron martesa bëjnë një divorc dhe kaq, janë pa taban, ata nuk kanë parti. Ne po kërkojmë që të plotësohen kushtet e Bundestagut, po bëjmë variantin tonë të reformës zgjedhore sepse Bundestagu nuk e pranon reformën zgjedhore pa pjesëmarrjen e opozitës reale’, tha Gjata.
