Një ndër pikëpyetjet që kanë qytetarët lidhet me faktin nëse ka sezon veror sivjet. Në çastin kur numri i të infektuarve është në trend rrënës, edhe më shumë shtohet entuziasmi se situata është drejt përmirësimit. Mjeku infeksionist Pëllumb Pipero ka dhënë një lajm mjaft të mirë, lidhur me sezonin veror.
“Unë besoj që Vlora gradualisht po bëhet gati, sepse masat po lehtësohen dita-ditës. Epidemia ka një ritëm gradual, por ulës në vijimësi. Ndërkohë Vlora nesër shpallet zonë e gjelbër, dhe është një lajm jashtëzakonisht i mirë.
Ka 3-4 javë pa asnjë rast të ri, kështu që në qoftë se ju e konsideroni një mesazh të tillë, le të jetë ky i afrimit të turizmit për Vlorën. Pse jo?!”, tha Pëllumb Pipero për “News 24”.
Por çfarë e ka favorizuar Vlorën? Pipero përmend disa arsye, duke mos harruar bujarinë e Zotit. Ai nënvizoi ndër të tjera se strategjia e gjurmimit të kontakteve ka qenë efikas. Po kështu, izolimi i shpejtë i rasteve me klinikë dhe i kontakteve.
“Ekipet e mjekëve epidemiologë dhe specialistëve, kanë bërë një punë të mrekullueshme në gjithë vendin. Strategjia e gjurmimit të kontakteve ka qenë efikas, monitorimi adekuat i situatës, izolimi i shpejtë i rasteve me klinikë dhe i kontakteve, kanë mundësuar që të izolohet shumë shpejt çdo rast i ri i konstatuar në Vlorë. Ky ka qenë çelësi i suksesit mendoj unë, dhe nga ana tjetër besoj që ndryshe nga sa jemi mësuar që vlonjatët janë pak popull rebel. Besoj fort që qytetarët e Vlorës kanë respektuar në mënyrë optimale udhëzimet apo urdhrat e qeverisë, i kanë respektuar normat e distancimit social, këshillat që kemi dhënë ne dhe ndoshta është dhe pak dhuratë e Zotit, fat”, deklaroi ai.
