Teksa situata me koronavirusin paraqitet me shifra të qëndrueshme, shqiptarët shtojnë edhe më shumë pyetjet nëse do të ketë këtë sezon veror plazh.
Drejtoresha e Agjencisë Kombëtare të Turizmit, Kornelia Ferizaj, në një intervistë në “Ditë e Re”, ka thënë se planet tashmë janë në konkretizim e sipër. E ndërsa plazhi do të bëhet falë disa masave, të cilat duhet të zbatohen me rigorozitet nga të gjithë pa përjashtim. Për të shmangur një numër të lartë të të infektuave, është projektuar edhe se si do të bëhet banjo dielli.
Kornelia Ferizaj flet për një skenar pozitiv, nëse kufijtë do hapen gradualisht. Ndërkohë që masat që janë parashikuar është që çadrat të vendosen në një hapësirë prej 3.5 metra. Po kështu edhe distanca në det duhet të jetë 3 metra.
“Nëse do shkosh të marrësh dicka në bar apo restorant, duhet të ruash distancën 2 metra për person. Në tavolinat e restoranteve duhet të ketë minimumi 4 persona për 10 metra katror. Dhe 1 metër në distancë nga personi në person”, u shpreh ajo.
“Do të ketë ndryshim dhe shërbimet e bufesë të mëngjesit. Do të ofrohen kryesisht shërbimet në dhoma. Si dhe çdo hotel duhet të përcaktojë një koordinator anti COVID-19”.
