Seanca e sotme tek Komisioni i Ligjeve është shoqëruar me debate të shumta. Deputeti Myslim Murrizi kërkoi që 21 Janari të shpallet festë kombëtare, që përkon me Kongresin e Lushnjes.
“Kërkoj që 21 Janari, për rëndësinë që ka kjo datë, të shpallet festë kombëtare siç është 28 Nëntori apo festat e tjera. Kërkoj votën pro të anëtarëve të këtij Komisioni”.
Kështu ka deklaruar deputeti i opozitës parlamentare, Myslim Murrizi, ku po shqyrtohet projektligji për festat zyrtare.
Bëhet fjalë për 21 Janarin e 1920-ës, dita kur u mblodh Kongresi i Lushnjës në të cilin u miratua një akt kushtetues për pavarësinë e plotë të Shqipërisë.
Deputeti Murrizi kërkoi që 21 Janari, të shpallej festë kombëtare në nderim të Kongresit të Lushnjes. Kjo u kundërshtua nga Alket Hyseni.
Nuk mungoi një përplasje mes Alimadhit dhe Ulsi Manjës.
DEBATI:
Murrizi: Kongresi i Lushnjes duhet të jetë Festë Zyrtare, pasi ka qenë me rëndësi të madhe për vendin. Kërkesa i është dërguar kreut të Kuvendit, kryeministrit, si dhe presidentit.
Kongresi i Lushnjes është viti i parë i Parlamentarizmit, është festuar për 17 vite me radhë, deri në 1939. Në diktaturë, 21 Janari u zëvendësua me 11 Janarin. 1 ditë festë më shumë, kushton shumë më pak se një PPP që jepni ju. Përveç 28 Nëntorit, asnjë festë s’ka rëndësinë e 21 Janarit. Ky duhet të ishte një nga propozimet e bëra që në Kuvendin e parë pluralist.
Alket Hyseni: Kemi më shumë festa zyrtare se çdo vend në rajon. Na rëndon buxhetin.
Adriatik Alimadhi– Partia Socialiste kriminale….
Ulsi Manja– Të lutem z. Alimadhi, respekto etikën. Kemi 800 mijë persona që na kanë votuar.
Adriatik Alimadhi: Pse u preke?
Ulsi Manja: Atë fjalën kriminale hiqe të lutem.
Adriatik Alimadhi: Shoku shkon më shumë ju, jo ballist për mua.
Ulsi Manja: Nuk ta jap të drejtën e fjalës. Harroje.
