Seanca plenare sot ka nisur me debate të forta, mes deputetëve të opozitës dhe mazhorancës. Përfaqësuesit demokratë kanë kërkuar ndërprerjen e seancës së Kuvendit, pasi pretendojnë se iu është hequr e drejta e fjalës.
Ata thanë se çdo deputeti i takon 10 minuta për diskutim. Sekretari i Përgjithshëm i PD-së, Gazment Bardhi, kërkoi sqarime për këtë situatë. “Na argumentoni pse keni hequr të drejtën e fjalës për opozitën? Çdo deputeti i takon 10 minuta”.
Nga ana tjetër, kryetari i Grupit Parlamentar të PS-së, Taulant Balla, iu rikujtoi deputetëve opozitarë që vendi është në një situatë pandemie. E për rrjedhojë, do të ketë seanca me kohë të shkurtuar.
Ai kërkoi nga të gjithë deputetët që të vaksionohen, dhe të mos abuzojnë me rregulloren e Kuvendit. “Jemi në gjendje pandemie, nuk ka Parlament në Europë që nuk i zhvillon seancat me kohë të shkurtuar. Do të reduktohet koha që flasin deputetët, deri sa të vaksinohen të gjithë. Mos abuzoni, duke iu referuar rregullores. Kompetenca është e Konferencës së Kryetares. Kjo seancë do të zhvillohet sipas këtij vendimi”, tha Balla.
