Tre nga nëntë të akuzuarit se do të kryenin sulme terroriste ndaj kombëtares së Izraelit, në ndeshjen që u zhvillua në Shkodër përballë Shqipërisë, kanë pranuar autorësinë se kishin planifikuar sulm terrorist ndaj izraelitëve. Ata janë akuzuar nga Gjykata Themelore në Prishtinë për terrorizëm. Ndërsa të mërkurën para trupit gjykues fajësinë e kanë pranuar Kenan Plakaj dhe Besart Peci, por më herët fajësinë e kishte pranuar edhe Arton Ahmeti.
Sipas Prokurorisë Speciale, Kenan Plakaj ka prodhuar mjete shpërthyese, kurse Besart Pecit i janë gjetur armë automatike dhe rreth 90 copë fishekë. Në vitin 2016, Policia e Kosovës kishte parandaluar një sulm të mundshëm terrorist kundër kombëtares së Izraelit në futboll në ndeshjen përballë kombëtares së Shqipërisë, që ishte planifikuar të mbahej në Shkodër. Fillimisht u arrestuan 18 persona dhe vetëm ndaj 9 personave u ngritën aktakuza. Ende nuk dihet se sa mund të dënohen të tre personat që tashmë kanë pranuar fajësinë. Pasi në vitin 2015, Kosova ka aprovuar një ligj që sanksionon çdo person që merr pjesë në luftëra të huaja dhe mund të dënohet deri në 15 vjet burg.
Në aktakuzën e ngritur nga Prokuroria thuhet se disa prej të akuzuarve kanë qenë në kontakt me të ashtuquajturin lider të shqiptarëve në kuadër të grupit militant Shteti Islamik në Siri dhe Irak, Lavdrim Muhaxheri nga ku kanë marrë urdhra për të kryer sulme. Muhaxheri i cili njihej si komandant i shqiptarëve brenda ISIS-it raportohet se është vrarë në muajin qershor, ka deklaruar familja e tij. Tek të akuzuarit është gjetur dhe eksplozivë i llojit të ngjashëm me atë që është përdorur gjatë sulmeve në Paris dhe Bruksel.
