Ministrja e Shëndetësisë dhe Mbrojtjes Sociale, Ogerta Manastirliu, ka deklaruar se shërbimi shëndetësor për qytetarët e prekur nga tërmeti do të vijojë të ofrohet.
Manastirlliu ka qenë e pranishme në Qendrën Sociale “Gonxhe Bojaxhi”, nga ku u shpreh se do të vijojë programi i vaksinimit për çdo qytetar që është pjesë e grupeve të rrezikuara për tu prekur nga gripi.
“Është bërë plani shumë i detajuar me mjekët e familjes dhe është organizuar puna që mjekët në strukturat akomoduese të ofrojnë shërbim për çdo qytetar në nevojë, duke identifikuar të sëmurët kronikë dhe duke ofruar terapitë e mjekimit secilit prej tyre. Janë më shumë se 530 qytetarë të sëmurë kronikë që po marrin mjekimin e nevojshëm në pikat ku janë strehuar përkohësisht. Janë 1338 qytetarë që janë vaksinuar kundër gripit në pikat e emergjencës ku janë akomoduar përkohësisht dhe do të vijojmë vaksinimin në çdo njësi ku janë sistemuar banorët e prekur nga tërmeti”, tha ajo.
Sipas ministres, deri më tani mjekët kanë kryer më shumë se 5 mijë vizita mjekësore në hotele dhe pikat e emergjencës, ku janë sistemuar banorët e prekur nga tërmeti.
