Në komunikimin me gazetarët lidhur me prezantimin e rezultateve të mbledhjes së opinioneve të qytetarëve për Këshillimin Kombëtar, kryeministri Rama u ndal tek “Ballkani i Hapur”. Ai u shpreh se Shqipëria, “Ballkanin e Hapur” nuk e bën për Serbinë, por për të mbrojtur interesat e saj.
“Sa i përket kostos së procesit është minimale në raport me përfitimin nga procesi. Ky proces do të kthehet në traditë, dhe do të jetë një proces që do të vazhdojë. Ne do të merremi me gjerat që kanë të bëjnë me jetën e përditshme të njerëzve.
Gjithashtu me rëndësi është edhe përfshirja e jonë me njerëzit. Tani temë nuk mund të jetë a doni të hiqet taksa e naftës, nëse ne bëjmë një Këshillim Kombëtar për naftën sepse do të na dali të hiqen të gjitha taksat.
Këshillimi Kombëtar bëhet për të çarë disa rrugë të reja. Tani ka folur opinioni publik shqiptar, këtë gjë duhet ta marrin në konsideratë edhe partnerët tanë që këtu duhet të bëhet çdo gjë që thotë populli shqiptar. Sot që flasim, jemi vendi më kesh që ka Europa, me më pak përfshirje të pasurisë në sisteme bankare në Europë, që do të thotë një ekonomi informale. Çdo pikë djerse e emigrantëve duhet të çmohet në mënyrë financiare duke u formalizuar”, tha Rama.
Kreu i qeverisë Edi Rama deklaroi sot që do të bëhen rishikime në procesin e Vettingut të prokurorëve dhe gjyqtarëve, duke shtuar se ata do të hetohen pas pezullimit nga detyra. Ai tha shkurt dhe qartë se qeveria nuk pezullon gjykatësit apo prokurorët.
“Ndonëse i bëj pyetje vetes nëse e keni seriozisht apo bëni një pyetje që është pa kuptim, por duhet bërë. Ne jemi edhe pushtet legjislativ. Nuk kemi punë. Nuk pezullon qeveria gjykatësit apo prokurorët. Bëhet fjalë për një ndërhyrje në legjislacion, që ka qenë në Reformën në Drejtësi por pastaj ka rënë rrugës. Që këta njerëz të pezullohen në vend dhe pastaj të hetohen. Edhe vendimi im ka qenë absolutisht si ky që thonë qytetarët, por mbështetja e qytetarëve për këto vendime na jep një përgjegjësi më shumë. Këtë do e bëjmë ashtu si kemi bërë të gjitha gjërat që kemi thënë. Gjërat që unë them bëhen, është vetëm çështje kohe”, deklaroi Rama.
Lidhur me shkarkimin e Ervin Bushatit nga posti i kreut të Postës Shqiptare, Rama u shpreh se nuk komenton vendime të tilla. Ai tha se nuk jep përgjigje për këto vendime, dhe se nuk është temë që duhet trajtuar.
“Sa i përket drejtorit, kjo është risi në konferencën e shtypit. Unë nuk përgjigjem për vënie dhe largime drejtorësh. Nuk është fare temë për këtë sallë”, u shpreh Rama.
