Kryeministri Albin Kurti ka komentuar rezultatin zgjedhor, pas raundit të dytë të zgjedhjeve në 21 komuna. Ai ka thënë se është i pakënaqur me këtë rezultat, dhe kjo vjen si pasojë e disa problematikave të brendshme, që duhet ti sqarojnë.
“Rezultati jo i kënaqshëm për neve vjen si rezultat i disa defekteve të brendshme të cilat duhet ti analizojmë më gjatë në vijim, dhe i bashkimit të të gjithë tjerëve kundër LVV-së”, tha Kurti.
Kryeministri uroi të gjithë kryetarët e komunave që u zgjodhën dje. “Administrimi i procesit zgjedhor nga KQZ ishte shumë i mirë. I uroj të gjithë kryetarët e komunave që u zgjodhën dje.
Do të kenë shumë beteja dhe punë në përballje me krimin dhe korrupsionin, posaçërisht në fushën e ndërtimit të egër ku paratë e mëdha në qytetet tona po shpërlahen duke shkatërruar me ndërtim të egër. Do të bashkëpunoj me ta në këtë betejë”, tha Kurti.
Në Kosovë u zhvillua në 21 komuna raundi i dytë i zgjedhjeve lokale. Prishtina, në katër vitet e ardhshme dhe pas tetë vite qeverisje nga Vetëvendosja, do të udhëhiqet nga Lidhja Demokratike e Kosovës (LDK) me kryetarin e ri Përparim Rama, që ishte në garë me kandidatin e Vetëvendosjes Arben Vitia, i cili deri para dy muajsh ishte Ministër i Shëndetësisë në qeverinë e Albin Kurtit.
