Duke parë që shifrat e të prekurve me koronavirus janë në trend rritës, kryeministri Rama ka dhënë paralajmërimin e radhës ndaj qytetarëve e po kështu edhe ndaj bizneseve që kanë shkelur rregullat.
Shpesh bizneset kanë shprehur pakënaqësi, por Rama ka vendosur që të mos tolerojë më nëse sheh shkelje. Në një komunikim në Facebook, ai ka dhënë sinjalet e qarta ndaj bizneseve.
“Grumbullimet nuk do të lejohen më. Policia do të bëjë detyrën pa bërë asnjë dallim. Kush merr pjesë në grumbullime, në grupime më të mëdha sesa numrat e lejuar, do të penalizohet.
Bizneset që nuk zbatojnë protokollet, nuk do të tolerohen më. Përveç gjobave do të rrezikojnë edhe humbjen e lirisë.
Qytetarët do të lëvizin lirisht, por do të penalizohen nëse kapen në shkelje në hapësirat publike. Të më ndjeni, por kështu jo më!”.
