Ambasadorja amerikane, Yuri Kim, ka qenë e pranishme në përurimin e memorialit të parë për Holokaustin në Tiranë. Në fjalën e saj, ajo tha se shqiptarët shpëtuan qindra hebrenj, dhe dhanë një histori frymëzuese të besës shqiptare. Ambasadorja po kështu ka shprehur falenderimet ndaj shqiptarëve, për këtë shembull të shndritshëm, siç e cilësoi ajo.
“Nuk mendoj që ka shumë vende dhe shumë popuj në botë, që të kenë një memorial të tillë. Kjo është ajo që mendoj, kur mendoj për terminologjinë, për atë që mendon populli hebre për ata që janë të drejtë.
Pas ngjitjes në pushtet të Hitlerit, shqiptarët shpëtuan qindra hebrenj nga vdekja e sigurt. Ku pushtuesit nazistë kërkuan një listë të qytetarëve hebrenj, qeveria shqiptare refuzoi.
Shqiptarët nga gjithë sferat e jetës, myslimanë, krishterë, të arsimuar, fshatarë, punuan për të shpëtuar miqtë e tyre, hebrenjtë. Është histori frymëzuese e besës shqiptare.
Jam shumë krenare që qeveria e SHBA nëpërmjet Komisionit të ruajtjes së trashëgimisë, ka mundësi të vlerësojë Shqipërinë nëpërmjet këtij memoriali.
Falenderoj qeverinë e Shqipërisë, kryeministrin, kryebashkiakun Veliaj që mundësuan realizimin e këtij projekti. Do doja të falenderoja shqiptarët për këtë shembull të shndritshëm.
Më lejoni gjithashtu, të vlerësoj John Withers, që bëri përpjekje të mëdha për ngritjen e këtij memoriali. Ai vëren se 80 vjet më parë, errësira përfshiu botën, por drita shkëlqeu në Shqipëri. Miliona hebrenj, dhe popuj të tjerë u zhdukën. Kudo, përveç në Shqipëri, ku populli shqiptar qëndroi për jetën dhe mbroi miqtë e tyre. Ky memorial nuk ka të bëjë vetëm me të kaluarën, por dhe me të ardhmen.
Ky memorial na kujton gjithmonë rëndësinë e veprave të tilla. U frymëzofshim nga shqiptarët dhe hebrenjtë për veprimet tona humaniste dhe të nderit”, tha Kim.
