Personaliteti i madh italian, Vittorio Sgarbi ka qenë i pranishëm këto ditë në Shqipëri, ku ka vizituar vende të ndryshme me qëllim promovimin e tyre.
Por duket se ai ka bërë krejt të kundërtën, pasi në një vizitë në Bylis, Sgarbi e ka cilësuar atë si një qytetërim grek. Sgarbi është shprehur kështu në një postim të tijin në Instagram, por edhe në një video.
Ndërkohë lidhur me këtë ka reaguar edhe Forumi i Mbrojtjes së Trashëgimisë Kulturore. Arkeologu Neritan Ceka.
Ai ka shpërthyer në revoltë ndaj ministres së Kulturës, Elva Margariti, e cila e ka shoqëruar gjatë këtyre ditëve në vizitat e tij.
“Kush do ia ketë thënë Zgarbit që Bylis është grek? Nuk mjaftoi që bënë grek Butrintin, tani edhe Bylisi na doli qytet grek. Bilmezat e Ministrisë së Kulturës nuk i thanë se ishte në mes të mallakastriotëve dhe po i falej lebërve. Këta pasardhës të grekëve janë? I nderuar Zgarbi, falju edhe një herë zotit të Bylisit të na shpëtojë nga injoranca e Ministrisë së Kulturës. Amen”, shkruan Ceka.
Kujtojmë se dy ditë më parë, Sgarbi rrezikoi të mbytej në Palasë por u shpëtua nga vajza e tij dhe një roje bregdetare.
