Kryeprokurorja e Tiranës, Elisabeta Imeraj ka treguar arsyet se përse intitucioni që ajo drejton, vendosi të rihapë hetimet, për vrasjen e protestuesve në 21 janar të vitit 2011.
E ftuar në emisionin ”Opinon” në Tv Klan, Imeraj u shpreh se Prokuroria e Tiranës e mori këtë vendim, për shkak se për dy nga viktimat ka patur një pezullim të hetimeve.
E pyetur nëse ky vendim vjen si pasojë e një prapavije politike, Imeraj e mohoi këtë hipotezë, teksa shtoi se rihetimi po bëhet për të gjetur autorët e vërtetë.
Pjesë nga biseda në studio:
Fevziu: Përse rihapet 21 Janari, a është kjo një pengmarrje e politikës?
Imeraj: Është një vendim i marrë nga Prokuroria e Rrethit Gjyqësor Tiranë për rifillimin e hetimeve. Në rangun e hetimeve të kësaj dosjeje, disa persona janë hetuar dhe janë dërguar në gjykim, ndërsa pjesa tjetër e dojes është pezulluar dhe ju është referuar organeve të policisë.
Fevziu: Që do të thotë për 2 persona janë gjetur përgjegjësit…
Imeraj: Për dy të tjerë është vendosur pezullimi i hetimeve.
Fevziu: Pezullimi për sa kohë është i vlefshëm, mund të rihapet një çështje edhe pas 50 vitesh?
Imeraj: Një prokuror dhe prokuroria në tërësi, interes parësor kanë gjetjen e autorit. Nga ana e organeve të policisë është bërë një listim i detajuar i veprimeve që mund të kryhen dhe që nuk ka qenë e mundur të bëhen në periudha të caktuara dhe në argumentimin e plotë, prokuroria në rrethana të reja reja ka vendosur rifillimin e hetimeve.
Fevziu: A ka prapavijë politike?
Imeraj: Aboslutisht që jo.
Fevziu: Ka fakte të reja në këtë hetim apo një rihetim I fakteve të dikurshme?
Imeraj: Në asnjë mënyrë nuk ndodh rihetimi i fakteve. Ka një rihetim të filluar për të gjetur autorin ose autorët e një ngjarjeje të tillë.
21 janari, rihapet hetimi për dy nga viktimat
Më 27 maj, Prokuroria e Tiranës vendosi të hapë hetimet për vdekjen e Aleks Nikës dhe Hekuran Dedës për ngjarjen e 21 janarit 2011 në Bulevardin “Dëshmorët e Kombit.” Sipas Prokurorisë ka prova të reja të cilat mund të zbardhin vrasjet e mbetura pa autor.
Një prej tyre është edhe vrasja e Aleks Nikës, pasi predha e gjetur në kokën e tij ishte e dëmtuar dhe nuk kishte mundësi të ekspertohej nga cila armë ishte goditur. Një tjetër vrasje që mbeti e pazbardhur ishte dhe ajo e Hekuran Dedës.
