“Nëse SHBA-ja do të vendosë sanksione kundër nesh, ne do të kundërpërgjigjemi”. Këto janë disa fjalët e ministrit të Punëve të Jashtme Turke, Mevlut Cavusoglu, për blerjet e sistemit raketor rus nga ana e Turqisë.
Sipas tij, Turqia do të vendosë sanksione hakmarrëse ndaj Shteteve të Bashkuara, nëse ato e ndëshkojnë Turqinë për blerjen e sistemit raketor rus “S-400”. Gjithashtu, ai ka pohuar për mediat se Turqia ka arritur një marrëveshje me Britaninë e Madhe për blerjen e aeroplanëve luftarakë.
Nga ana tjetër, Uashangtoni pritet të bëjë sot lëvizjen e radhës kundër Turqisë. Ligjvënësit amerikanë do të votojnë një rezolutë, e cila parashikon sanksione kundër Turqisë për shkak të blerjes së sistemit rus “S-400”.
“Ligjvënësit amerikanë duhet të kuptojnë se nuk do të arrijnë askund përmes imponimeve. Nëse Shtetet e Bashkuara kanë qasje pozitive ndaj nesh, ne do të reagojmë gjithashtu pozitivisht. Por, nëse ata marrin masa negative, atëherë ne do t’ua kthejmë ato”, tha Cavusoglu.
Uashingtoni thotë se sistemi “S-400” paraqet kërcënim për aeroplanët luftarakë të tipit F-35 dhe se nuk mund të integrohet në sistemet mbrojtëse të NATO-s. Si kundërpërgjigje për këtë blerje, Shtetet e Bashkuara e kanë ndërprerë programin e përbashkët me Turqinë për aeroplanët F-35, shkruan “Reuters”.
Marrëdhëniet mes Turqisë dhe Shteteve të Bashkuara viteve të fundit janë tensionuar kohë pas kohe edhe për çështje të tjera, përfshirë përkrahjen që amerikanët ua kanë dhënë forcave kurde në Siri, shkruan “Reuters”.
