Astrit Patozi ironizon heshtjen e Bashës, pas qëndrimit publik të Berishës, duke thënë se nga e gjithë kjo situatë vetëm ai po del “i fituar”, të cilit i duket sikur po “shkëlqen” me mosreagimin e tij. Në konferencën për media, Berisha sulmoi hapur ambasadoren Kim për qëndrimet e saj kundër tij.
Berisha nuk la vend për interpretim kur tha se do të jetë në shtator në Parlament si deputet i PD-së, dhe për këtë nuk ka asnjë forcë që e ndal. Ai hodhi akuza mbi ambasadoren e SHBA-së se po sillet si Guvernatore në Tiranë, dhe se ajo duhet të kërkojë ndjesë publikisht për deklaratën kur i kujtoi demokratëve shprehjen e vjetër ‘edhe bar do hamë’.
Por pas këtij qëndrimi, Basha hesht. Duke marrë shkas nga kjo situatë, Astrit Patozi thotë se deri më tani ka fituar Basha. Kjo pasi ka marrë njëkohësisht vlerësimet e Berishës, ashtu edhe të ambasadores Kim.
Statusi
DERI TANI KA “FITUAR” VETËM BASHA
Dënimi amerikan për Berishën duket se do të mbetet e vetmja temë e rëndësishme politike e kësaj vere tmerrësisht të nxehtë.
Por çudia e madhe e këtij debati, që po arrin kulme të reja, është Lulzim Basha, i cili po shkëlqen edhe me heshtjen e vet.
Sepse deri tani ia ka dalë që të marrë njëkohësisht vlerësimet e të dyja palëve ndërluftuese, si të Sali Berishës, ashtu edhe të ambasadores Kim. Të dy ata kanë deklaruar se kanë pasur një bisedë shumë të mirë me kryetarin e PD për çështjen e doktorit “non grata”.
Si të mos ishte hallexhiu, që duhet të bëjë patjetër një zgjedhje përvëluese, por si ta kishin caktuar arbitër apo ndërmjetësues për ta mbyllur luftën pa të lënduar. Dhe kjo është meritë, që i duhet njohur, të paktën deri në shtator.
