Në një kohë kur situata mes Rusisë dhe Ukrainës është tejet e tensionuar, me frikën e një pushtimi të mundshëm, presidenti Meta ka pritur në një takim ambasadorin e Ukrainës në Tiranë.
Kreu i Shtetit njofton se takimi mes palëve është fokusuar për situatën e rënduar në Ukrainë, ku ndanë shqetësimin e përbashkët për kërcënimin e një agresioni të mundshëm rus ndaj Ukrainës, në shkelje flagrante të së drejtës ndërkombëtare.
Meta ka konfirmuar se Shqipëria, edhe si vend anëtar i NATO-s dhe anëtar jo i përhershëm i Këshillit të Sigurimit të Kombeve të Bashkuara, është në krah të Ukrainës, në mbrojtje të sovranitetit dhe integritetit territorial të saj.
Njoftimi
Sot prita Ambasadorin e Ukrainës në Tiranë, Sh.T.Z. Volodymyr Shkurov. Diskutuam kryesisht për situatën rreth Ukrainës. Ndamë shqetësimin e përbashkët për kërcënimin e një agresioni të mundshëm rus ndaj Ukrainës mike, në shkelje flagrante të së drejtës ndërkombëtare.
U informova nga Ambasadori dhe përgëzova për përpjekjet e vendit të tij për t’i zgjidhur mosmarrëveshjet nëpërmjet negociatave dhe në rrugë paqësore, përfshi në kuadër të formateve shumëpalëshe ekzistuese.
Konfirmova se Shqipëria, edhe si vend anëtar i NATO-s dhe anëtar jo i përhershëm i Këshillit të Sigurimit të Kombeve të Bashkuara, është në krah të Ukrainës në mbrojtje të sovranitetit dhe integritetit territorial të saj.
Kujtojmë këtu se Ministri i Jashtëm rus Sergey Lavrov, u ka dërguar SHBA-ve, Kanadasë dhe disa vendeve evropiane, mes tyre edhe Shqipërisë, nje letër ku kërkon angazhim nga këto vende që të respektojnë sipas saj detyrimet që i japin marrëveshjet ndërkombëtare.
Sipas Rusisë vendet perëndimore vazhdojnë të nxjerrin prej saj vetëm ato elemente që u përshtaten atyre, dhe konkretisht – të drejtën e shteteve për të qenë të lirë të zgjedhin aleancat për të garantuar ekskluzivisht sigurinë e tyre. Kjo letër është konsideruar nga ish-Kryeministri Berisha si një kërcënim i hapur, ndërkohë që sipas tij Kryeministri Rama hesht. Për Berishën kjo është një letër që është dërguar nga ambasada ruse në Tiranë.
